عمو عبده والوزير

حمل عبده كحيان زعيم الغلابة وممثل الفقراء والمتحدث الرسمي لمحدودي الدخل تساؤلاته إلي ناظر المالية الدكتور يوسف بطرس غالي بحثا عن إجابات تغنيه عن السؤال وتعفيه عن طلب الاستجواب وتبعده عن طلبات الاحاطة. خاصة بعد أن أغلق مجلسا الشعب والشوري أبوابهما وعلقا لافتة ممنوع الدخول والسؤال.. فدار هذا الحوار..
كحيان: هتعزمني علي إيه النهارده يا معالي الوزير يا أبوالكرم كله أنا آخر مرة شربت عند زميلك المهندس رشيد محمد رشيد وزير التجارة والصناعة مشروب سحري اسمه "كوكتيل" كله فيتامينات.
الوزير: يا تري أخدته في العضل ولا الوريد؟!
كحيان: أنا فعلا أول ما عرفت الفيتامينات اللي فيه افتكرته حقنة.. المهم هتشربني ايه النهارده؟
الوزير: واضح أنك مولود في المطبخ.. عشان همك علي بطنك يا كحيان.
كحيان: أنا فعلا مولود في المطبخ بس مين "الفتان" اللي قالك بس الحمد لله ما نزلتش في الحلة!
الوزير: أنا ما عنديش غير مشروب "السوبيا" .. ولو مش عاجبك ما تشربش.. خش علي السؤال!
كحيان: في الدول المتقدمة والبلاد المتحضرة بتصرف إعانة بطالة للشباب العاطل وحكومتنا عندنا مطنشة!
الوزير: احنا ما عندناش أزمة في فرص العمل.. احنا عندنا الأزمة في الشباب. الكل عاوز يشتغل مدير!
كحيان: في الدول المتقدمة والبلاد المتحضرة. الناس لا تأكل أرجل الفراخ لكن عندنا ثلث الشعب المصري بياكلها وفي العشوائيات أرجل الفراخ وجبة البروتين الأساسية علي مائدتهم!
الوزير: ناس بتفهم لأن أرجل الطيور فيها كل الفيتامييات.. أنت ناسي الأمهات زمان كانت بتنصح أولادها بعدم الأكل وهم واقفين عشان الأكل ما ينزلشي في رجليهم.. لكن الفراخ بتاكل وهي واقفة يعني رجليها كلها فيتامينات.. ده حتي الأغنياء عرفوا اللعبة وبياكلوا أرجل الجاموس والبقر اللي اسمها "الكوارع".. يعني أرجل الطيور والحيوانات وحدت الأغنياء مع الفقراء علي لقمة واحدة!
كحيان: في الدول المتقدمة والبلاد المتحضرة بتشجع موظفيها علي الانجاب باعتبار الأولاد ثروة قومية واحنا عندنا الوقفة المصرية في كل حتة!
الوزير: احنا اكتشفنا أن كل المشاكل من "خلفة" الموظفين خاصة موظفي المحليات وقطاع الأعمال العام لأن كل "خلفتهم" توأم.. عارف ليه يا كحيان.. عشان الموظف الحكومي بيستخدم ورق "الكربون" كثير فالنسخ بهت علي خلفته! ده إلي جانب أن أولاد موظفي الحكومة عفاريت وآخر شقاوة.. ربنا ياخدهم! ده كمان ما بيدفعوش ضرائب!
كحيان: في الدول المتقدمة والبلاد المتحضرة. الوزير بيلبس زي المواطن العادي وبياكل زي باقي الناس وبيركب مواصلات زي خلق ربنا.. واحنا عندنا الوزير بيلبس زي نجوم السيما وأكله كله مأكولات بحرية والعربية المرسيدس هي ركوبته المفضلة؟!
الوزير: طب ما تروح هناك.. وأنا مستعد أساعدك في التأشيرة وتعيش زي الوزير وتشوف المساواة علي حقيقتها وأصولها!
كحيان: طب ما الأسهل تجيب لنا عندنا الوزير اللي هناك.. بدل ما يروح 80 مليون مصري هناك!!