فـاطــنــه عــلـى
الحنية الزايدة والقلب المليان مواويل
والضحكه اللى تشق الصدر وتمحى الويل
فاطنه على أم الكلام معجون بالفرح
لاحيلتها سهم ولاقراط تشد بيه الحيل
لكن قلبها فدان كرم مابين ضلوعا طرح
أمى وعمتى والنجمه اللى هجرت دنيتى
بس نورها كاسى كل حـرف فــ كلمتى
طول منا معاها لا بحس نهار ولا لليل
تحكيلى ع الراجل اللى راح ع البحر
ولقى صاحبه قاعد مهموم
قاله مالك ياصاحبى
قاعد ف الحر وف السهوج
إلتفتله صاحبه وقال
قاع أعد الموج
قاله ياراجل قوم بلاشغل عيال
الجيات أكتر من الريحات
وشيل الهموم لايقدم ف اللى جاى
ولا حيرجع اللى عدى وفات
تحكيلى عن مر الحال لما كانو عيال
وتقلى ماكنش فيه غير البلح والبتاو
طب كان يقدر حد فينا يجيب سيرت الفلوس
والنبى كانت أمى تبطحنى وفوق رقبتى تدوس
مش كان فقر ياوليدى واغلى حاجه نملكها الطير
نبعلنا جوز حمام نخضوا اللبن ونبيعه جبن
ونستنوا من السنه للسنه موسم الحصيد
عشان حفنة غله وشوية تبن
والراجل من دول
يدفن نفسه جوه النول
قبل العين ماتشوف العين
مايطلعش منه غير فى الغيابه
يطلع وضهره متنى و محلول
والعيل سن عشره
تشوفه وهوا لابس الضمور
كتفه بكتف الرجال
الله لايوريك ياحبيبى قـِل المال .
كانت تصحينى امى من قبل الفجر
كل واحده فينا تشيل جرتها وع البحر
نعبى الميه ونرجع مكسورين الضهر
وكانوا عمامك زغيرين كانوا زى عيالى
أشيل ده واسكت ده وهم حمله تقيل
طب اقدر اقول وانا مالى
والنعمه شقينا ياولدى
الحرمه زى الراجل
يــدنـــا فـ يـــد بــعــض
نـِـشــتـــغـــلـــوا الـنـول
ونــــــراعــــــى الأرض
لاشفنا راحه ولا سمعنا جلع
وصوتنا يوم ما اتولدنا اتبلع
مش زى بنات الكلب بتوع دلوقت
الواحده منهم كسلانه لتغسل وشها
الميه فى البيت والعجز راكبها
ورجاله دلاديل لايهشوا ولاينشوا
من أول يوم راح فيه وشبكها
خيط ولفته على صباع رجليها
غيرش بس لابسلى جلبيه كاويها
متقلبش المر ياولدى وصر فـ قلبك
الواحد مننا زى ماجيه الدنيا
زى ما حيروح منيها
لابيوت ولاعيال ولاحاجه تسترنا
غــيــــر الأعـــمــــال -----
نـــهــــايــــتـــــه ----------
المره منينا ياولدى لوماكنتش شديده
مـاتــعـــمـــرش فــ بــيــت
ويدبل شبابها إكمن مالهاش غيط
وادينا اجوزنا وجبنا الولاد
وشربنا المر معاهم لجل الزاد
أبوهم سافر ع السودان
وانا اللى قعد أربى
شويه حَـنـيـنـه وشويه شديده
كنت المره والراجل
أب وأم وعزة ربى
عملنا اللى قدرنا عليه لحد ماكبروا
وياريتهم فضلوا معانا ألا سابونا وهجروا
واتوفى المرحوم الله يسامحه فـ قبره
كان لسه معايا شوية حمل
طب والنبى لولا معاشه ياولدى لكنت غرقت
زقيت بيه المركب لحد ماعديت ووصلت
وحمدت رب الخلايق وشكرت
وادينى بعاند فى الأيام
منتا عارف عمتك نزيهه
واللى فـ جيبها عمره ماكان ليها
حسيبه لمين وإيه فايدته بعدين
حق الكفن مقدور عليه
وكفيانا مرار الفقر وذل الدين
يومينى اللى باقين عايشاهم
والحاجات اللى نفسى فيها
تلاقينى على طول أروح شرياهم
متخفش على عمتك منتا عارفنى
عــــمـــــود مــــســــلــــــح
مش من الحريم اللى جسمها رحرح
ومخى الجاهل لسه مصحصح
طيبتى فـ قلبى وحقى فـ يدى
ولايهمنى حريم ولارجال
بقى أنا لـــوســاهــلــه
مش كانوا ناس النجع عملونى لعبه
وكورة يشطوها الكبار قبل العيال
فى مره جانى الواد يبكى
عمال يشنق قلتله مالك أحكى
قالى الراجل اللى عند المدرسه ضربنى
وقاللى يلعن أبوك غور متلعبش هنا
شديته من إيدة ورحناله بهدلته
قدام الناس وقدام مرته وعياله
قلتله أنتا قلت للواد يلعن أبوك
قاللى أيوه قلت
قلتله يلعن أبوك
واللى شال فـ كرب أبوك
ياراجل يابارد ياللى متختشيش
والنعمه ماتضرب الواد تانى
مايكفينى فيك عيلتك
بس ياولدى ومن ساعتها
والكل يعملى حساب
فـ حضورى والغياب
وعينى القويه
تفتح ألف باب
حقانية والحق زعل ناس كتير
بس برده الحق ليه أحباب كتير
أقلك حاجه متعرفهاش غير من عينى
سر وشلته فـ عتمة قلبى لاصاحب ولابير
حاكم السر ميشلهوش إلا صحابه
حتى اللى نايم جمبك ع السرير
متضمنهوش ومش حعيب ع الزمن
مش حقول جبروته غير حال الناس
لوعايز تحكم ع الزمن شيل الناس
وهات مكانهم ناس
من بره الدنيا
ناس قلوبها مفروده
مافيهاش ولا تنيه
ساعتها تعرف العيب على مين
ع الزمن اللى متغيرش
ولا ع الناس اللى بدلناهم بناس تانيه
حقولك السر واحكم
من غير ماتضحك عليه وتظلم
أنا ودى أرجع للزمان الفقرى
أحصد واقلع واصحى من بدرى
أربى الحمام جوه الجرار
واحادى الفروج لوطلع
من عشته يجرى
كلامى جد ومش هزار
حتقلى برده ياعمتى
عايزه ترجعى للشقا تانى
باين عليكى مليتى قعدتى
باين عليكى مش عايزانى
ومحبتك ياولدى كلامى صُــح
حتقلى كان مرار والعيشه كانت شُــح
حقلك معاك الحق
بس كان غطانا الحب
ننام ونصحى بيه
أه من قلبى واللى فيه
والغربه اللى هاجمه عليه
جايه من أحلى نعسه تصحيه
تشده يعاندها ويديها ضهره
خايف من الفقر
لكن تعمل ايه فـ القلب
لوإنه برد وداسه الشتا
ماتلاقيش حاجه تدفيه
ولا تغطيه إلا الحب
أنا ياولدى مش رايده الفقر
ولاعيشه من غير مراوح
يدبحنا فيها الحر
ولا واحشنى البرد والجوع
والغراق لما كان يبقى مالى النجوع
بس قلى إيه طعم الشبع
لما تبقى الروح جعانه
وإيه طعم الدفا
وبين الضلوع
بايته القلوب بردانه
بتدور على غطاها
وكل ماتشده ينسحب
فارس جالوا يوم لجل مايتغلب
وإسمه من كتب التاريخ يتشطب
لوتقدر ياولدى تعيش زمانك
بقلب من زمن تانى
أنا كنت عشت
وأه لوتطل جوه قلبى
تحس إنى عايشه
وتتأكد إنى مُـــت
بخطارو ياوليدى
سيبك من عمتك
أدعيلك دعوتين
يحَـلـو مرارة غربتك
ربنا يهديك لبنت الحلال
اللى تنور فرشتك
قمرايه تلالى
على مخدتك
وتجبلك العيال
اللى ينوروا دنيتك
واعيش لما اشوفك عريس
واشاركك فرحتك
ودموعى المتعطره
تشمها الناس فـ بدلتك
ربنا يخليك
ويطرح البركه فيك
ولا يشمت عدو فيك
ويزيدك ومن نعيمه يديك
ربنا يعزك مايذلك
ويزيدك مايقلك
ورحمته تصونك وتضللك
ربنا يوتق حزامك
ويعلى مقامك
ولايطوى سجادة الخير من قدامك
سلم على ابوك وامك واخواتك
والنبى ماعارفه أقلك ايه
طول عمرك ياوليدى
وانت حنين على عماتك
وربنا يعلم
محبتك جوه قلوبنا
زى ولادنا
يهل العيد وماحسش بيه
غير لما تجينى تقلى ياعمه
كلمه وبتنور أعيادنا
فرحه وبتخبط على بابنا
ربنا يديم عليك حنية قلبك
ومتزعلش من اللى يفارقك
طول ماليك أحباب بتحبك
يدارو شموعك ينورو دربك
وطول ماتحفظ حق الخالق
وطول مابترضا بحكمة ربك .
شــــــعــــــــر
أحـمـد جـمـال عـبـدالـحـمـيـد المسرت
موضوع: فــاطـنــه عــلــى