المره ولدت
وربنا اداها عمر
عيل بصلا ع النبى
ابيض بياض التلج
فلقة قمر
مبروك ماجالك
مبروك يابوعمر
يارب يتاقى فيه
وياخيه عقبال ماتخاويه
ومتقلقش ع المره
ربك ديماً بيسلم
لارحنا لدكتور
ولافتح ولاخياطه
دورها جه مستور
وساعتها ساهله
وبلغتنى أقول لك
لولا تعبها ولولا الملامه
كانت عدت لك بحور
لجل ماتشوف
الفرحه فـ عيونك
ولحد ماتقوم بسلامه
بتقول لك يابوعمر
ماطولش الغيبه عليها
دى الفرحه برجوعك
بتنور الضلمه فـ عينيها
ودراعاتك هى الضل
لما تحضنها تضلل عليها
بتقول لك لوعايشه
وسط ألوف
كأن روحها مسحوبه
ومابين ضلوعها
مغروسه السيوف
و مافيش غيرك
اللى يرد روحها فيها
عجل فى الجيه
وياريت تهل علينا
تهل بطلعتك البهيه
تروى الورده
اللى دبلت من الاشواق
وترجع النجمه
اللى هجرت سما العشاق
أه من الشوق ياخيه
دنا كيف ماكون مزروعه
فى أرض بور
مشتاقه لحنان الميه
متشلش هم الواد
وتقلى مستقبله
نأمنه كيف
ونجبله منين الزاد
طب يعنى من غير غربه
كانت العيال حتموت
وان كنا فقرا ولا معانا فلوس
كدا ولاكدا السنين حتفوت
ومدام معانا حق القوت
تبقى عمرانه البيوت
ماتقلش كيف
وربك مقسمها
دى اللقمه وسط الأهل
بتعدل الكيف
وقلى كيف
تعيش فى بلدك
كأنك ضيف .
تزورها شهر
وتمر زى الطيف
وتهجرها سنين
لوكنت حابب
تكون من الغايبين
قلى إيه ذنبى
أنكوى بالفراق
واصبح من التايهين
والواد اللى جانا
ذنبه ايه ميشوفش ابوه
بيقسم اللقمه معانا
ويشيله على كتفه زى العيال
ساعتها الواد حيكره الاموال
ذنبه إيه يتحرم من قولت يابايا
ويعيش العمر كله كأنه يـتـيـم
ويدور مايلاقيش ولا صدر حَـنـيـن
حتقلى الفلوس تسند له ضهره
وتشد حيله ع الايام
هوا انتا يعنى بتقرا الغيب
ولابس هوا كتر كلام
دنا من يوم ماخطيت برجلك
بره البيت
زى مايكون واحد شق قلبى
بسكين ورماه على الارض
كان هاين عليه أخبط راسى فـ حيط
كتمت لهفتى ومسكت طرحتى
ونزلت فيها من القهر عض
وقلت كيف حتعدى سنين
من غير ماتشوفنى ولااشوفك
وسندت راسى فوق ركبتى وبكيت
قلت لنفسى لواتحملت البعاد لليله
هوا مش حيطيق الفراق ويرجعلى
ميقدرش يصبر لليله واحده على بعدى
وطاوعك قلبك ونسيت عاشقينك
وادينا بعد العشق صبحنا ليمينك
لوكنا جايين على بالك وهامينك
ارجع وربى الواد بيدينك
وملس على شعرى بخدينك
طول منتا متغـرب يابوعمر
أنـا والــــواد مـيـدايـنـيـنـك
شــعـــر
أحمد جمال عبدالحميد المسرت
موضوع: مـبـروك مـاجـالـك