خيار السلام

خيار السلام
صنيبر ونادى
ومن غيط بلادى
وزارعاه ولادى
بنقطف وندى
لكل البلاد
بلاد الجوار
بياخدوا الخيار
خيار السلام

خيار السلام
صغير كبير
رفيع تخين
قصير طويل
على كل لون
وحسب المقاس
ومن غير مساس
بشكل المسار
مسار السلام
خلاصة الكلام
حدانا الخيار
خيار السلام

خيار السلام
ده آخر طراوة
وآخر نداوة
وآخر خضار
تقرقش تفرفش
وممكن تخرط
فى قلب الخيارة
فيحدث تعاون
ما بين الطماطم
وبين الخيار
فى وسط الصحون
فممكن نسدد
فوايد الديون
وممكن نخلل
خلال برطمان
فى وسع المحيط
ووسع الخليج
مخلل خيار
خيار السلام

خيار السلام
براءة اختراع
لراجل فشلة
ف شلة وحوش
دماغه فاشوش
يحب النظام
نظام المرونة
نظــــام الليونة
ومـــص اللمونة
عـــلى اللى باعونا
وبــــاعو القضية
فى ســـوق النخاسة
وحتى النحاسة
فى كاب الجنود
باعوها كمان
وباعوا المصير
وبعنا المخدة
وبعنا الحصير
ونام البلاط
وسهرت عيونا
ما بين البينين
ياإما نموت
بهم الحياة
يا إما نعيش
بطعم الممات
فحتماً وقطعاً
ولازماً نموت
وما لناش خيار
وما لناش إلا
خيار السلام


خيار السلام
تعالى دوق وجرب
خيارة فى بقك
فى بدء النهار
تنسيك همومك
تسيح شحومك
تنعنش ترطب
فى بدء النهار
وآخر النهار
خيارة السلام
ما تعرفش فين

ايه ياعم الجمال ده كله ولو عرفت الخيار ده فين يريت تقلي وبكام الواحدة ولابيتعمل عليه مزاد

اكيد فى الأمم المتحدة

او فى اي منظمة دولية

جميل شاعرنا الجميل